സംയുക്ത സൈനികമേധാവി ബിപിൻ റാവത്ത് സഞ്ചരിച്ച ഹെലികോപ്ടർ ഊട്ടിയിൽ തകർന്നു വീണു . തമിഴ്‌നാട്ടിലെ കൂനൂരിനടുത്ത് കാട്ടേരി ഫാമിനടുത്താണ് അപകടം. സംഭവത്തിൽ നാലു പേർ മരിച്ചതായി സ്ഥിരീകരിച്ചിട്ടുണ്ട്. ഇതുവരെ മൂന്ന് പേരെ രക്ഷപ്പെടുത്തി, മറ്റുള്ളവർക്കായി തിരച്ചിൽ തുടരുകയാണ്.
വിമാനത്തിൽ പതിനാല് പേർ ഉണ്ടായിരുന്നുവെന്നാണ് റിപ്പോർട്ട് . ബിപിൻ റാവത്തിനൊപ്പം , ഭാര്യയും ഉണ്ടായിരുന്നു. ഇരുവർക്കും ഗുരുതമായി പരിക്കേറ്റിട്ടുണ്ട് . കനത്ത മൂടൽ മഞ്ഞാണ് അപകടത്തിനിടയാക്കിയതെന്നാണ് റിപ്പോർട്ട് . ഹെലികോപ്റ്റർ പൂർണ്ണമായും കത്തിക്കരിഞ്ഞു .
സാരമായ പരിക്കുകളോടെ രക്ഷപ്പെടുത്തിയ മൂന്നുപേരെയും നീലഗിരി ജില്ലയിലെ വെല്ലിംഗ്ടൺ കന്റോൺമെന്റിലെ ആശുപത്രിയിൽ പ്രവേശിപ്പിച്ചു.ഇവരെ ഉടൻ കോയമ്പത്തൂരിലെ ആശുപത്രിയിലേയ്ക്ക് മാറ്റുമെന്ന് തമിഴ് നാട് സർക്കാർ അറിയിച്ചു . ചെന്നൈയിൽ നിന്നുള്ള വിദഗ്ധ ചികിത്സാ സംഘത്തെ ഊട്ടിയിലേയ്ക്ക് അയച്ചിട്ടുണ്ടെന്നും സർക്കാർ അറിയിച്ചു.
കോയമ്പത്തൂരിനടുത്തുള്ള സുലൂരിലെ ഇന്ത്യൻ വ്യോമസേനാ താവളത്തിൽ നിന്ന് കൂനൂരിലെ വെല്ലിംഗ്ടണിലേക്ക് പോകുകയായിരുന്നു ബിപിൻ റാവത്ത്.നാട്ടുകാരും , വിവിധ സംഘങ്ങളും രക്ഷാ പ്രവർത്തനത്തിലുണ്ട് . സംഭവത്തിൽ ഇന്ത്യൻ വ്യോമസേന അന്വേഷണം പ്രഖ്യാപിച്ചു.
Discussion about this post