വെടിയുണ്ടകൾ പായിക്കാൻ സ്വന്തം പിസ്റ്റൾ ; രാജ്യത്തിന് അഭിമാനമായി സൈനികൻ

മോ: ഇന്ത്യയിലെ ആദ്യത്തെ തദ്ദേശീയ 9 mm മെഷീൻ പിസ്റ്റളായി മാറി “ASMI”. പൂനെയിലെ ARDEയുടെ സഹായത്തോടെ മോ ഇൻ‌ഫൻട്രി സ്കൂളിലെ ലഫ്. കേണൽ പ്രസാദ് ബൻസോദ് ഈ തോക്ക് വികസിപ്പിച്ചെടുത്തത് വെറും നാല് മാസമെന്ന റെക്കോർഡ് സമയത്തിലാണ്.

എയർക്രാഫ്റ്റ് ഗ്രേഡ് അലുമിനിയത്തിൽ നിന്ന് നിർമ്മിച്ച അപ്പർ റിസീവറും കാർബൺ ഫൈബറിൽ നിർമ്മിച്ച ലോവർ റിസീവറുമാണ് “ASMI”യുടെ സവിശേഷത. മെറ്റൽ 3D പ്രിന്റിംഗിലൂടെ നിർമ്മിച്ച ട്രിഗർ ഘടകങ്ങൾ, 8 ഇഞ്ച് ബാരൽ, 33 റൗണ്ട് ശേഷിയുള്ള മാഗസിൻ തുടങ്ങിയവയാണ് മറ്റു പ്രത്യേകതകൾ.

0, 90, 180, 270 ഡിഗ്രികളിൽ (12’o ക്ളോക്ക്, 3’o ക്ളോക്ക്, 6’o ക്ളോക്ക്, 9’o ക്ളോക്ക് ദിശകൾ) വിവിധ ആധുനിക സ്കോപ്പുകൾ/ഒപ്റ്റിക്സ്, ആക്സസറികൾ, എം-ലോക്ക് സ്ലോട്ടുകൾ എന്നിവ ഫിറ്റ് ചെയ്യാൻ സാധിക്കുന്ന ഈ തോക്കിലെ അപ്പർ റിസീവറിൽ ഫുൾ ലെങ്ത് ഇന്റഗ്രൽ പിക്കാറ്റിന്നി റെയിൽ ഘടിപ്പിച്ചിരിക്കുന്നു. വ്യക്തിഗത ആയുധമെന്ന നിലയിൽ സായുധസേനയിൽ കമാൻഡർമാർ, ടാങ്ക്/എയർക്രാഫ്റ്റ് ക്രൂ, ഡ്രൈവർ / ഡിസ്‌പാച്ച് റൈഡേഴ്‌സ്, റേഡിയോ/റഡാർ ഓപ്പറേറ്റർമാർ തുടങ്ങിയ സൈനികർക്കും ക്ളോസ് ക്വാർട്ടർ കോംബാറ്റ്, കൗണ്ടർ ഇന്റലിജൻസ്/കൗണ്ടർ ടെററിസ്റ്റ് ഓപ്പറേഷനുകൾ, വിഐപി പ്രൊട്ടക്ഷൻ ഡ്യൂട്ടി, പൊലീസിംഗ് തുടങ്ങിയ വിവിധതരം ആവശ്യങ്ങൾക്കും ഒരുപോലെ ഉതകുന്ന ഒന്നാണ് ഈ തോക്ക്.

ASMIക്ക് കേന്ദ്ര, സംസ്ഥാന പോലീസ് സേനകളിൽ സ്ഥാനം ലഭിക്കുന്നതോടെ ഇതിന്റെ വലിയ അളവിലെ നിർമ്മാണം ധാരാളം തൊഴിലവസരങ്ങൾ സൃഷ്ടിക്കും. ഉത്പാദനച്ചെലവ് 50,000 രൂപയിൽ താഴെ ഒതുങ്ങുന്നതിനാൽ വൻതോതിലുള്ള കയറ്റുമതി സാധ്യതയും ഉണ്ട്. നാഗ്പൂർ സ്വദേശിയാണ് ലഫ്. കേണൽ ബൻസോദ്.